Zeche prelle
Text
Zeche prelle
Schiess dr Vogu ab.
Louf Amok u zerrtrenn z rote Band mit dr Schäri usem Näihchäschtli.
Tanz wiud u rund rund rundum wiene Kreisel uf de kontaminierte Schouplätz vor Nacht u chotz i fischter Eggä vor Spunte.
Chätsch dini Fingenäggu ab u schpöi se quer dür d Wohnig.
Lach dr d Seele usem Liib u versauz drbi dis Schoggimousse mit Schturzbachträne.
Wirf Luftballön gäge d Betonwang wo si mit dumpfem Grolle zerschelle, tuusig farbige Schärbistückli.
Rupf die Vogubeeri vom Busch u schtopf se dim Nachbar is Muu.
Lüpf dr Rock hoch übere Buchnabu u pägg drzue „Baum fäääällt“
Schtig uf ds Dach mit glitzerige Schtöggelischueh. Ballancier uf dr Gränzwärtigkeit.
Schpring dim Schatte drvo u glotz uf sis Schnäbi.
Fang dr Wind i u verpackne imne Imachglas, befrei dr Luftschturm are Sitzig im Büro, dasses Fönfrisure rägnet.
Lach se us, lach se a, brätsch ne d Fuscht i d Frässe u küssne ds Bluet ab dr Lippe.
Schlück dini Zäng u sini Zunge u ihri Therapieasätz.
Blas is Horn u rütsch drbi d Rutschbahn im Chopfschtang z dürab bis nie unge achunsch.
Erfing e nöii Bewegig, lah se la patenitiere u verchoufse für 20 Rappe z schtück a Bättler bir Notschlafschteu.
Lahne wüeschte Furz im Restaurant la ligge schtouzier mit Hysterie ir Bruscht wiene Dame zum Usgang.
Göiss am Läbe is Ohr, ignoriere d Pflichte u verfüehr d Samichlous.
Machs!
© Merlin
Eure Worte gehen mir tief!
Das hanimir natürlech grad biudlech i mim Büro vorgschteut u lut use müesse lache.
Gueti Idee, da mau öpis uf Bärndütsch z schribe.